Sa tekivu tale na veiqaravi ni Tabana ni Vosa kei na iTovo Vakaviti (TVTV) ni Tabacakacaka iTaukei ena nodra vakararamataki na cauravou era vakarautaki e Nadave, qaravi ena siga Lotulevu na ika8 ni Epereli 2021.

E dau qaravi na vuli ena veiyakavi ni Lotulevu, ka sa toso cake sara na kedra iwiliwili nira sa 85 taucoko na lewenivuli. Na matai ni wasewase ni vuli era vakararamataki ena ulutaga ni “O cei o yau ena loma ni vuvale” ka kena inaki mera kilai ira vakavinaka kei na nodra veiwekani.

Era taileitaka na cauravou na veika era bulagoci kina, ni vakamacalataki na itovo ni veiwekani, na ikacikaci kei na ivakarau ni kena matanataki. Dua na kena ivakaraitaki, oya ni rau veivosalevutaki na veitavaleni, rau na veirokovi na veiganeni, ia vei ira na veitavaleni veitacini, era na sega sara nira veidouvaki mera veiwali vakasivia, ia era na veidokai toka. Na veivakararamataki qo ena tomani ena macawa ka tu mai.