Turaga na I Liuliu ni Bose ni Yasana ko Tailevu
Vanua saka I Kubuna vei ira na Turaga na Vunivalu, na Tui Kaba
Naisanokonoko, vei ira na Turaga Bale na Ratu
Rara o Nakelo, Vei ira saka na Turaga na Tui Nakelo
Sa tiko saka na lewe ni Bose ni Yasana
Turaga na I Talatala Qase
Turaga Talai Veivuke kei na Vakailesilesi Vakamatanitu
Turaga Roko Tui kei na Vakailesilesi ni Yasana

Ni sa bula vinaka.

Au doka ka marautaka vakalevu na noqu mai tiko maliwai kemuni na lewenibose ni Yasana vakaturaga o Tailevu, ena vuku ni bose kacivi ka qaravi saka tiko e daidai.

E da mai dabe tale e daidai e na dua na tavata ka vakarautaki vakalawa e na ruku ni Lawa ni Veika Vakaitaukei me rawa ni da veitalanoataka na veika me baleta na tiko vinaka kei na nodra liutaki vinaka na I Taukei e na loma ni Yasana.

Ke dua na ka e vakasaqarai e na Bose oqo, me kune ga kina na I tuvatuva vinaka me baleta keda kei ira na noda kawa e na veisiga ni mataka. Oqo saka na I tavi ni Matabose oqo.

E ra se qai lesu saka tiko mai na Roko Tui e na macawa sa vakanadakui e na nodra vakarautaki macawa 3 mai Nadave. Qo e tiki ni kena vakasaqarai na vinaka ni veiqaravi ka na tetevi ira yani na vo ni vakailesilesi na vuli ni veiliutaki vakaoqo.

E ra laki luvata na nodra I sala vaka Roko Tui, vaka Manidia, vaka veiliutaki e na 3 na macawa oqo, ka ra daramaka tale na I sala ni gonevuli me rawa ni ra vulica tale na vakarorogo kei na talairawarawa ka bucini e lomadra na yalo ni cakacaka vata me baleti keda na I Taukei.

E sa I tavi levu dina e tiko e ligadra, ia e na rawa duadua ga e na nomudou veitokoni na veiliutaki e na veivuvale Vanua, Yasana, Tikina kei na noda veikoro.

E da lako curuma e dua na gauna ni veisau, totolo na veivakatorocaketaki e na mona livaliva (technology) ka da sa bula e na dua na vuravura veisemati (globalisation).

Sa qai kena I kuri, ni mai curu na veimate me vaka na COVID 19, na leqa tubu koso, ka ra mai botea e levu na I tuvatuva ka bolea na bula vakailavo e na noda vuravura, sega ni galala kina na noda vanua.Na veiulutaga kece oqori e na rawa duadua ga e na solesolevaki kei na veirairaici. Me da tuvatuva vata ka toso e na veinanumi me rawa ni kakua ni dua e lutu, se, e na nodatou vosa e Tailevu - no one is left behind.

E a vakaraitaka talega vei keda na I Liuliu ni Matanitu e na Bose sa oti ni veivakatorocaketaki e Viti e se bera sara ni yacova na ivakatagedegede e gadrevi. Ena loma ni Yasana, sa laurai sara na tubu, vakabibi ena vakaduri bisinisi. E sa vakayacori tiko na cakacaka ni kena vakalevutaki na rara ni waqavuka e Nausori, qo ena vakavurea vakalevu na tubu ni bisinisi ena loma ni Yasana, me vaka e vakadinadinataki mai Nadi.

Sa tataunaka talega e daidai na Tabacakacaka I Taukei na bibi ni kena vakatawani na I tikotiko vakaturaga, na kena tuberi na I sausauvou e na noda veivuvale vanua kei na kena maroroi na noda vosa, i Vakarau kei na i tovo.

Sa kena I kuri na nodra laurai na I taba qase kei ira e sega ni tuvaki vinaka na I tuvaki ni yagodra ni dodonu me ra tiki talega ni noda I tuvatuva.

Au vakabauta ni tiko talega e so na lewe ni Bose ni Yasana vou kau sa cavuta na vakanuinui vinaka e na vuku ni I tavi ko ni sa kacivi kina. E ratou na qai veivuke na neitou vakailesilesi e na nomuni tuberi e na vuku ni nomuni I tavi.

Sa nuitaki ni na dua na Bose vinaka vei keda na bose e daidai, ka na rawa ni matata kina na toso ni Yasana ko Tailevu me baleta na noda veisiga ni mataka.

Ena vica na malanivosa oqori, au sa dolava kina na Bose ni Yasana Kacivi ni Yasana Vakaturaga o Tailevu.

Vinaka vakalevu.

 

Arrow
Arrow
ArrowArrow
Slider