Ena Vakaraubuka na ika15 ni siga ni vula o Me, 2020, era cabe mai kina na wekada mai na yanuyanu o Rotuma, me ra mai solia na nodra cau ni veivuke, vei ira na wekada era vakacacani ena Cagilaba o Harold. E qaravi na veisolisoli qo ena rara ni koro ni iTaukei e Draiba, era kauta mai na wekada mai na yanuyanu o Rotuma, na vuaniqele, me magiti ni veivuke. Na uvi, vavaitamera lelevu, na dalo, niu kei na tini bulumakau lelevu, e so na veika era kauta mai mera mai solia ina Matanitu. A cabori taumada na isevusevu ni Matanitu, mai vei ira na vakailesilesi ni Tabacakacaka iTaukei, mera sevuti, ka ra kidavaki kina, a qaravi tale ga, na yaqona qaravaki, nibera, ni ra solia mai vakavanua na veika era kauta mai. E soli mai ena kena ivalavala vakavanua, vakaRotuma, sa qai ciqomi yani ena Matanitu. Era a vakaitavi na Minisita ni Veivakatoroicaketaki ena Taudaku ni Korolelevu kei na Leqa Tubukoso, Inia Seruiratu, ena ciqomi ni magiti ni veivuke mai na Yanuyanu o Rotuma. Era cauraka taumada na Turaga Minisita, na nodra vakavinavinaka kei na kena marautaki na veika era matanataka na wekada mai Rotuma. Kuria, ni sa bolei Viti, vakauasivi na kawa iTaukei, na veika era sa vakaraitaka na wekada mai Rotuma. Era kauta mai na vuaniqele me magiti ni veivuke. Era tomana, ni qo e dua na ivalavala se ivakarau ni bula makawa vakaitaukei, na vakayagataki ni vuaniqele, mevaka na tivoli, kawai, rauva kei na uvi, me kakana ni cagilaba. Vei ira na noda qase taumada, sega ni nadaku ga na cagi, mera sa tagica mai na kakana ni veivuke, e dau sinai vinaka tu na lololo ena uvi, dau vakayagataki na tivoli, rauva kei na uvi ni veikau. Ni ra vakaitavi oti na Turaga Minisita, sa qai cabori na kamunaga mai na Matanitu, me iulivaki se ivakaivinavinaka ni magiti, era kauta mai na wekada mai Rotuma. A tini na veiqaravi qo, ena dua na Lotu, nibera ni qai vakayagataki na waikatakata kei na wainivanua. Na Magiti ni veivuke qo, me na veikauyaki yani ena veiyasai Viti, era vakaleqai ena Cagilaba o Harold. E imatai ni gauna me tuva ena lomanikoro e Draiba, na uvilelevu, e veibolei vakalevu vei keda na kawa itaukei. Me kakua ni da sa vakararavi tu ga ina Matanitu, e tu ga na veika e baleti keda, rawa ni tauri keda tu, ni oti na cagilaba. Sa na dua na itukutuku levu, meda sa na rai tiko mai, sa kau yani na uvi mai Rotuma, meda lai vakayagataka, me lai veivuke ena noda vakacokotaki na kawa iTaukei. Sa vakauti na vakavinavinaka ni Matanitulevu ina Yavusa e Vitu, ena Yanuyanu o Rotuma. Vinaka vakalevu na veivakadeitaki, vinaka tale ga vakalevu na veirairaici, lai raici lesu tiko mai na kawa iTaukei. Vakauti tale ga na vakavinavinaka ena Valenivolavola e qarava na Leqatubukoso, kei na Tabacakacaka e qarava na Veivakatoroicaketakiena taudaku ni koro lelevu kei na Leqa Tubukoso kei na kena digitaki o Draiba, me mai qaravi kina na veiqaraqaravi.