Ena ika3 ni Me 2019, na ikarua ni siga ni kena Sevutaki na Yabaki ni Vosanivanua e Vuravura, a dolava na soqo na iVukevuke ni Vunivola Tudei ni Tabacakavaka iTaukei o Mr. Saimoni Waibuta.

Eratou a vakarâ na turaga ni yavusa o Navunisea e Silana, Dawasamu, Tailevu, na meke ni cocoka, ena kena cokai na ika na ‘yawa’. E matalia na meke qo ni sega ni vakayagataki kina na iri, moto se iwau. E matanataki ga ena kaukauwa ni imoimoi ni yagodra, ligadra, yavadra kei na kena vesa.

Eratou veivakamarautaki tale ga na matasere na Kabu ni Waikatakata ni Nawaikama, Gau.

E tini na soqo qo ena kena sa dodo e rara na nodra vakamalolo na marama ni Silina, talanoataki kina na ta waqa nei Rokola ena loma ni vanua e Nakauvadra.

A sevutaki tale ga kina na katokatoni ni vucu, sere ni meimei, na itukuni, kei na vica na veiqaravi vakavanua a se katona na Vale ni iYaya Maroroi (Fiji Museum) ena 1970. Ena rawa ni oni vakatataro ina kena valenivolavola ena talevoni – 3315944 se ni imeli - This email address is being protected from spambots. You need JavaScript enabled to view it.

Sa vakanuinui na Tabacakacaka iTaukei, Tabana ni Vosa kei na iTovo Vakaviti, na Matabose ni iLavo ni iTaukei (TTFB) kei na Vale ni iYaya Maroroi (Fiji Museum), nida na vosataka na noda vosa ka matanataka na kena itovo, me rawa ni bula tiko ga vei keda na vosa kei na itovo vakaitaukei mevaka ni isolisoli ni Kalou vei keda na kena kawa tamata.

Ni qai nanamaki tiko mai, ni na qaravi tale kina e dua na noda soqo vakaqo.