Sa vakacagau sara tiko na vuli ni ta waqaniviti e Vanuaseu, na nodra itikotiko na Tui Vulaga ena nodra tokoni na cauravou kei na gonetagane ena ikarua ni macawa ni vuli. Dina ga ni usutu ni vuli na ta waqaniviti, ia e vakavotukanataki tale ga ena vuli na solesolevaki kei na kena vaqaqacotaki na nodra veiwekani, ka ivakaraitaki ni nodra sasaga mera maroroa na vuku itaukei ni ta waqaniviti ka isolisoli ni Kalou vei ira. Era vakaraitaka ni sa oti e dua na gauna balavu, me qai rogo tale na matau ni sivisivi e Vanuaseu, tavaki kina na takia ka ra kilai kina na Jafau; nira kena dau ena ta waqaniviti. E vakabulai tale ga na kena umavosa ni ta waqaniviti mevaka na vosa na “vavovoli, sarulaki, ulaula” – era vosa veiwekani ina ta waqaniviti. E kena ibalebale, ni gauna e maroroi kina na itovo, ena bula vata kaya na kena vosa. Ni qai nanamaki tiko mai ena macawa mai qo, ena ikuri ni italanoa ni vuli ta waqaniviti mai Vulaga Lau.