Ena ika18 ni Veverueri 2019, e dola kina na vuli ni ta waqaniviti, e rauta ni 20 na itabagone era vuli tiko me vula dua mai Muanaicake, Vulaga, Lau. Era qarava na vuli na qase ni vanua o Vanuaseu, ena kena vakadewataki na kilaka ni ta waqaniviti, ka veitokoni kina na Tabacakacaka iTaukei ena kena valenivolavola ni Tabana ni Vosa kei na iTovo Vakaviti. Era solevaka na vanua na qaravi ni vuli, me rawa ni vakacavari ena loma ni dua ga na vula mevaka ni cakacaka dredre. Ena imatai ni macawa, sa tavaki kina na dagoniwaqa kei na kena drua. E vakayagataki na kau na baulevu me tã kina na waqa qo. Sa qaravi oti na kena raici, tavaki, cicikete, tukidreketaki na waqa ruarua. Na ituvatuva tarava na kena vakasavasavataki na waqa, vakarautaki na ikarikari, na ivanã, na tau, na sai kei na buturara e lomaniwaqa. Nira vakatarogi na qasenivanua ena vuku ni vuli, era vakananuma lesu na gauna era dau saravi ira kina na matua nira tâ waqa ena gauna e liu, era dau vakayagataka na matauvatu, ena gauna qo sa vakarawarawataki na musu kau ena kena vakayagataki na ivaro. Era marautaka vakalevu na kena lai qaravi na vuli baleta nira se bula na turaga ni vanua era kila vakamatata na ivakarau ni kena dau tã na Drua se Waqaniviti. Ni qai nanamaki tiko mai ena macawa mai qo, me kuri tale yani kina na italanoa ni vuli mai Vulaga, Lau.