A qaravi ena Siga Vakarauwai na ika03 ni Evereli, 2021 e rua na vuli ni veivakararamataki ena Keba ni Mataveitokani;

1. Tabacakacaka o Nasinu MYF – qaravi mai Muainase, Navuso
2. Tabacakacaka o Kalabu MYF – qaravi ena valenisoqo e Kalabu

E duavata ga na ulutaga e vakarautaka na Lotu Wesele e Viti kei Rotuma me baleti ira na itabagone, oya na “Na Veiwekani ni Noda iTovo Kei Na iVakarau vakavanua ni semati vata Kei Na Noda Qaravi Kalou.”

Era veiwasei ka veitalanoa na itabagone ena bibi ni nodra volai ena ivolanikawabula, na kena itavi, itovo e matanataki ena nodra qarava na vanua; ka vakaveiwekanitaki ina susugi ni bula vakayalo ena Lotu.

Ni veidonui na qaravi ni veivakararamataki kei na macawa ni siganimate, era tataunaki na itabagone ena rai vakayalo ni kauveilatai, oya na veisemati ni Kalou ina Vanua, veisemati ina veikabula kei na bula vakaveiwekani.